Ինչն է մեծացնում ստենոկարդիայի վտանգը. armeniamedicalcenter.am

Կան մի շարք վնասակար սովորություններ, որոնք նպաստում են ստենոկարդիայի առաջացմանը:

ՍԽԱԼ ՍՆՆԴԱԿԱՐԳԸ

Կարևոր է ինչպես սննդի քանակը, այնպես էլ օգտագործվող սննդի որակը: Դրանց խախտումն առաջացնում է ճարպակալում, որի արդյունքում արյան մեջ բարձրանում է խոլեսթերինի մակարդակը, ինչն էլ սրտի անոթներում խոլեսթերինային կուտակումների պատճառ է դառնում, որոնք փակելով անոթների լուսանցքը՝ դժվարեցնում կամ արգելակում են այդ հատվածի արյան հոսքը՝ նվազեցնելով սրտամկանի սնուցումը:

ՆՍՏԱԿՅԱՑ ԱՊՐԵԼԱԿԵՐՊԸ

Ճարպակալման և գերսնվելու հետ նպաստող գործոն է նաև  նստակյաց կենսակերպը:
Կանոնավոր ֆիզիկական աշխատանքի, մարզումների պակասը խիստ բացասաբար է ազդում սրտի վրա՝  նպաստելով ստենոկարդիայի առաջացմանը:

ԾԽԵԼԸ

Ծխելը նկատելիորեն  բարձրացնում է շատ սիրտ-անոթային հիվանդությունների վտանգը, այդ թվում՝ ստենոկարդիայի և արդյունքում՝ հանկարծամահության: Դա բացատրվում է ինչպես սրտի վրա նիկոտինի անմիջական ազդեցությամբ, այնպես էլ նիկոտինի ազդեցությամբ զարգացող զուգահեռ հիվանդություններով, օրինակ թոքային խնդիրներով:

ԲԺՇԿԻ  ՆՇԱՆԱԿՈՒՄՆԵՐԸ  ՉԿԱՏԱՐԵԼԸ

Անհրաժեշտության դեպքում բժշկի նշանակումներին չհետևելը նույնպես մեծացնում է այս հիվանդության ռիսկերը: Եթե նշանակված են հակագերճնշումային  դեղեր, ապա դրանք չընդունելը բերում է սրտային լուրջ բարդությունների առաջացման:

Ի՞ՆՉ ԱՆԵԼ ՍՏԵՆՈԿԱՐԴԻԱՅԻ ԴԵՊՔՈՒՄ

Ստենոկարդիայի ախտորոշումից հետո պետք է առաջին հերթին հիմնավորապես վերանայել ապրելակերպը:

• Աստիճանաբար ավելացնել ամենօրյա  ֆիզիկական ակտիվությունը, զբաղվել  բուժական մարմնամարզության բժշկի կամ մասնագիտացած մարզիչի հսկողությամբ: Ցանկալի է զբաղվել նաև վազքով, լողով, հեծանվային սպորտով, պարով և այլն:
• Վերանայել և կարգավորել սնունդը:
• Նվազեցնել սթրեսները, իսկ եթե դա անհնար է՝ սովորել դրանց դեմ ճիշտ պայքարել:
• Դեղորայքն ընդունել ըստ բժշկի ցուցումների, բայց միշտ հիշել, որ դա պետք է ապրելակերպի շտկումից հետո երկրորդ տեղում լինի:

Հարցեր, պատասխաններ, մեկնաբանություններ